Nesta parroquia consérvanse os restos dunha igrexa románica de finais do século XII, a cal foi un mosteiro, probablemente de monxas beneditinas. O único que queda da súa construción é a súa ábsida, de cuarto de esfera sobre nervios procedentes de pequenas columnas, no cal se aprecian tamén pequenas ventás de arquivolta semi-circular, apoiada en columnas por dentro e por fóra. Tamén posúe ménsulas, e os arcos interiores dalgunha ventá son de ferradura de influencia mozárabe. Estes restos poden ser visitados en Mondariz-Balneario, a onde foron trasladados a principios do século pasado. Así pois, en Casteláns consérvanse varios escudos heráldicos en varias casas que teñen un notable interese.