Dende a capital do concello de Sober collemos a estrada LU-P-5908 en dirección ao lugar de Rosende e, despois de percorridos 3Km, chegamos a unha rotonda e seguimos as indicacións cara á escola de hostalería. Inmediatamente despois vemos un camiño á man esquerda que será polo que debemos seguir.

A fervenza está a uns 600 metros, polo que podemos aparcar aquí para continuar a pé. Uns metros máis adiante atoparemos un indicador cara ao salto de auga e comezaremos o descenso en zig zag entre viñedos. O último treito está acondicionado con pasarela e escaleiras de madeira que nos levan ata unha plataforma a modo de miradoiro sobre esta fervenza situada no barranco de Portizó, afluente do río Cabe.