Igrexa de orixes románicas reformada nos s. XVIII e s. XIX. Ten unha nave de planta rectangular, muros de cantería e cuberta a dúas augas. Na fachada ten unha porta enmarcada por un arco de medio punto e arquivoltas, a externa decorada con motivos xeométricos e asentada sobre dúas pequenas columnas con capitel esquematizado. Enriba hai un van rectangular. Sancristía pegada a un lateral da cabeceira. Espadana de dobre corpo con dous arcos de medio punto, coroamento triangular con arco e decorada con pináculos rematados en bóla. No seu interior ten un arco lobulado de ferradura e esculturas.