Tratase do cruceiro máis elaborado e artístico dos existentes no concello de Laxe.

Situado nunha propiedade privada, a certa distancia da igrexa parroquial, á beira da estrada de Laxe a Camariñas. O máis salientable é o dobre retablo pétreo que hai colocado sobre a mesa ou pousadoiro que o preside. Formado por dúas placas pétreas: a inferior, rectangular, divídese a súa vez en dous cadros nos que vemos, por unha banda, símbolos da paixón de Cristo (esqueira, martelo, coroa de espiñas e cáliz), e pola outra, unha píntega coas patas dianteiras abertas e a cola enroscada (representación, como a serpe, do pecado orixinal). A peza superior contén catro bustos en relevo, de figuras barbadas, que representan as ánimas do purgatorio. O varal cilíndrico sostén un capitel de molduras circulares con catro caras en relevo en cada esquina. Cruz cilíndrica, con Cristo crucificado no anverso e a Virxe orando no reverso. Temos unha referencia documental alusiva a este cruceiro de data de 1852.