Construída entre os séculos XVII e XVIII, é de estilo barroco. Ten unha planta de cruz latina con dúas capelas; a do Rosario é de estilo renacentista e a da Asunción de estilo barroco. A capela maior está cuberta por unha bóveda de canón de cantería e está reforzada no centro cun arco faixón. Desta igrexa destaca a fermosa torre do campanario, obra do autor da Torre do Reloxo da catedral de Santiago de Compostela, o arquitecto ceense Domingo Antonio de Andrade. Esta torre ten unha altura de 21,8 metros e 35 escalinatas.