Igrexa barroca do s.XVIII na que a Virxe das Neves, acompañada co Neno, aparece representada sobre a portada principal, a xeito de fornela. Igrexa sinxela, do barroco popular galego e dunha soa nave. Destaca no seu interior a figura de San Brais, posiblemente de época anterior, e o retablo maior barroco con diversas esculturas entre as que destaca San Gregorio, San Francisco e Santa Teresa. Pegado á igrexa, e sobre un alto zócolo, sitúase un monumental peto de ánimas. O peto foi realizado no ano 1885.