A rota Arredor de Cambre permite achegarse a coñecer estas terras que, tan próximas á cidade da Coruña, aínda gozan de tranquilos e privilexiados lugares naturais e pechadas fragas.

Comeza a senda na propia vila de Cambre, a carón do Museo do Xacemento Romano e moi preto do monumento nacional do antigo mosteiro de Santa María de Cambre, unha magnífica xoia do románico galego. Durante a rota pasaremos xunto aos castros de Cambre e de Armental, por profundas congostras e pola misteriosa Pena de Nosa Señora, chea de gravados e inscricións de escuro significado.

Tras o fermoso paseo, e achegándose ao centro de Cambre, pódese gozar das vistas da vila e moi especialmente das antigas e curiosas casas coloniais.