Esta capela foi erixida nos anos 1761-62, sendo o autor da súa fachada Juan López Freire; e foi remodelada no segundo cuarto do s. XIX. A súa planta, dunha única nave, é de cruz latina cos brazos do cruceiro moi curtos, aos que se accede por arcos de medio punto. Á ábsida, semicircular, tamén se accede baixo un arco de medio punto. A fachada, de historicismo clasicista, levántase sobre podio de escaleiras. A portada alintelada está flanqueada por monumentais pilastras pegadas. Sobre a portada ábrese un van rectangular, que vai seguido dun friso con tríglifos e métopas. Sobre todo iso, un grande frontón clásico triangular sobre o que se asenta a espadana. Nos extremos remátase con pináculos.