Casa construída no século XVIII con dúas fachadas feitas con cadeirado, apicoada a que dá á rúa Alta e cicelada a que dá á rúa Real. Os seus esquinais enmárcanse entre pilastras que percorren as tres plantas. Obsérvanse detalles barrocos, coma os valados en cóbado na parte superior dos vans e adornos en forma de gotas no peitoril das ventás laterais. Ten un pequeno balcón central no primeiro piso e un percorrido no segundo. Enriba da cornixa sobresaen dúas bufardas a modo de torres con cornixa e gárgolas.

O edificio é, na actualidade, parte da sede do Rexistro da Propiedade de Vigo.