*Abre cando hai exposicións. Construción do s. XVII. É un dos grandes pazos composteláns, antiga propiedade dos marqueses de Bendaña. En altura estrutúrase en tres corpos, destacando os artísticos balcóns, cuns enreixados barrocos de factura compostelá no último deles. O resto dos vans dispóñense simetricamente con respecto á porta principal, enmarcada por xogos de molduras e volutas que rompen a horizontalidade e a seriedade de liñas do conxunto. A cornixa interrómpese co escudo rematado pola figura de Atlas, para uns, ou Hércules, para outros, sostendo a bola do mundo. Na actualidade, este edificio, propiedade municipal, alberga salas de exposicións, de conferencias e outras actividades culturais.
Uso actual: Museo da Fundación Granell.