Edificio de Tollet (1902), de estilo ecléctico. Situado no Campus de Esteiro, antigo hospital de San Carlos da Mariña. A rehabilitación, levada a cabo por Alfredo Alcalá Navarro (1996), aportou un magnífico edificio de estética tradicional no seu exterior e funcional no seu interior. Sistema construtivo de grosos muros de pedra revocada con amplas ventás enmarcadas por cantería. Incorpóranse ao edificio dúas galerías corridas na súa fachada principal. Na súa construción empréganse materiais modernos, de aí que ofreza un deseño actualizado. Nela realízanse os estudos de Humanidades e Biblioteconomía-Documentación da Universidade da Coruña.