Esta ruta enmárcase dentro do territorio do Parque Natural Baixa Limia-Serra do Xurés, o que lle dá un grande atractivo, posto que atravesa lugares que conservan o carácter propio das poboacións de montaña. Na súa parte final mostra a fronteira natural que separa Galicia de Portugal, e presenta unha equilibrada combinación de intereses culturais, etnográficos e paisaxísticos.
A pedra ten un protagonismo especial nesta ruta, podéndose contemplar un minucioso traballo de empedrado propio da mellor das calzadas, co que se pretendía suavizar os desniveis e fixar o terreo.
Tras abandonar Guxinde, unha primeira derivación invita a visitar un muíño restaurado. Máis adiante, un segundo desvío diríxese á aldea da Pereira. Atravesando as últimas casas da poboación vólvese conectar co camiño principal, converténdose esta derivación en case unha pequena circular.
Unha vez que se regresa á ruta principal, e tras pasar pola Gurita, chégase ao lugar coñecido como A Casa do Frade, que marca o límite con Portugal e que nos ofrece unha espectacular panorámica do Parque Natural. Douscentos metros máis abaixo do miradoiro atópase o Muíño da Casa do Frade, recentemente restaurado, pero que non se aconsella visitar xa que o seu acceso é perigoso.