Dentro da Casa do Pescador, os cadros están repartidos polas dependencias da Confraría de Pescadores, o Fogar do Pensionista e o Bar Pescador. O pintor surrealista coruñés Urbano Lugrís (1908- 1973) pintou cinco frescos e tres trípticos para a inauguración da Casa do Pescador durante a súa estadía en Malpica nos anos 50. Urbano Lugrís inspirábase no mar, en concreto no mar de Malpica e a vida desta vila mariñeira está presente nas súas obras, unha homenaxe ás illas Sisargas e aos mariñeiros malpicáns. Para ver todos os cadros é preciso visitar a Casa do Pescador no horario da Confraría por ser o máis limitado.