É a única muralla romana do mundo que se conserva practicamente enteira. Levantouse entre finais do século III e principios do IV, seguindo os canons marcados por Vitruvio. Mide máis de dous quilómetros e conserva setenta e unha das oitenta e cinco torres orixinais. A muralla presenta dez portas, cinco delas existentes en época romana, aínda que modificadas. Ten unha altura media de dez metros e nalgúns puntos pode chegar a unha anchura de sete.

A antiga Lucus Augusti atesoura excepcionais monumentos, como a catedral de Santa María, gran igrexa románica que ten o privilexio da exposición permanente do Santísimo Sacramento.

A muralla foi declarada Monumento Histórico Nacional en 1921 para dotala de maior protección e o centro urbano lucense recoñeceuse en 1973 como Conxunto Histórico. Xa no ano 2000 a UNESCO declarou á muralla romana de Lugo Patrimonio da Humanidade.