A igrexa de estilo románico e barroco é famosa pola súa cruz procesional, considerada a máis antiga de Galicia. Trátase dunha xoia da ourivería galega do século XII, tempos do arcebispo Xelmírez. Dise que o doador da cruz, Ordoño, puido ser un abade de Moraime que a legou a Serramo para enriquecer a igrexa tras un ataque ao lugar por parte de piratas. Alén dos retablos barrocos, destaca no seu interior a tumba do creador da capela de Santo Antonio, un sacerdote que asocia no seu escudo a súa liñaxe á descendencia dos Moscoso de Altamira entre outras familias.