A Igrexa parroquial de San Salvador de Coiro é de estilo Barroco, aínda que é moi probable que existise unha construción de época máis antiga. Áchase encravada nunha paraxe natural de grande valor ecolóxico e dende o cal se pode obter unha excelente vista panorámica do municipio e da ría de Vigo. Consta dunha única nave cuberta con bóveda de estrela, sendo esta de nervios no presbiterio. Destaca ao exterior a súa gran Torre Campanario, dunhas proporcións notables e que parece non gardar relación co resto da estrutura eclesial. Esta Torre é máis grosa cara ao centro e foi construída no século XVIII polos mestres Novás de Tui.