Ourense é unha das grandes cidades de Galicia, sendo a terceira entidade de poboación do país. A cidade da auga pola súa relación co río Miño e pola relevancia termal, permite un recomendable paseo no que xuntar patrimonio, natureza e boa gastronomía regada cos grandes viños da provincia.

O casco histórico ourensán é un conxunto de grande interese: a Catedral, obra románica con diversas influenzas polas sucesivas reformas, baixo a advocación de San Martiño; As Burgas, fontes termais do século XVII pero que veñen sendo utilizadas dende a Idade Antiga, e que permiten hoxe un caloroso baño no centro da cidade; e feiticeiros recunchos como o praza do Trigo, o Eironciño dos Cabaleiros ou a praza da Madalena.

O itinerario parte da Ponte Vella, de orixe romana, e reconstrucións dos séculos XIII e XVII , é un punto estratéxico de paso da Vía da Prata. Foi declarada Monumento Histórico-Artístico no ano 1961. Dende a capela dos Remedios, temos unha fermosa perspectiva.

O itinerario a carón do río Miño permite ir vendo o paseo da ribeira e as sucesivas pontes, incluíndo a contemporánea Ponte do Milenio, obra vangardista do ano 2001 e que constitúe un miradoiro en si mesma. O percorrido segue baixando pola marxe esquerda do Miño até chegar ao parque das Termas de Outariz.

No tránsito de Barbadás a Toén, o frondoso bosque de ribeira deixa paso a extensos viñedos, protexidos polo val fluvial e que medran coas altas temperaturas do verán. A chegada do outono tinta estas paisaxes do seu variado cromatismo.

O camiño cara a Ribadavia pasa polo Parque Náutico de Castrelo, acertada iniciativa que soubo conxugar o lecer co aproveitamento hidroeléctrico. Moi preto, na zona da presa temos unha fermosa estampa coa igrexa de Santa María de Castrelo dominando a paisaxe dende un outeiro elevado sobre o río.

Ribadavia, capital do Ribeiro, acubíllase a carón do río Avia, que se atopa co Miño pouco despois da vila. O seu legado patrimonial e a profusa cultura do viño ben merecen unha tranquila parada.