Un dos catro sendeiros da rede Rutas do Salnés, no corazón das Rías Baixas. É unha antiga verea que daba servizo aos muíños e tamén era utilizada  polos romeiros o luns de Pascua para chegar ata o mosteiro de Santa María da Armenteira.

Neste curto sendeiro visitaremos máis de 30 muíños, moitos deles de incrible factura.  Comeza no municipio de Meis e descende por un estreito sendeiro  paralelo ao río Armenteira, no que atoparemos algún paso dificultoso. Este primeiro tramo acumula maior desnivel e por esa razón  encontraremos maior numero de muíños, todos identificados polo seu nome. No muíño do Souto poderemos contemplar ademais unha pouco frecuente serra de auga.

A medida que avanzamos a pendente suavízase, despois da área recreativa seguimos por un confortable paseo xunto ao río, xa no municipio de Ribadumia. Moi agradable para facer en familia e unha escapada para os veraneantes da zona en días nubrados.