É a ruta máis curta da rede de sendeiros da Terra Chá con só 5,7 km que transcorren polo interior dunha fraga, unindo no seu percorrido cinco muíños de auga construídos ao longo do río da Fraga.

Ten un trazado lineal que comeza no Lugar da Laxe, xunto ao muíño restaurado de Corvite. Neste tramo o camiño segue paralelo á canle do río Anllo cuberto por un bosque de ribeira. Logo cruza a carreteira e discorre por un antigo camiño de carros que daba servizo á intensa actividade que se desenvolveu neste pequeno río.

O primeiro que atopamos é o muíño chamado do Mazo, a medida que nos internamos no espléndido souto veremos os muíños de Trasón, da Fraga e do Escaravello, todos eles emprazados en lugares estratéxicos para o aproveitamento da forza da auga.

Na última parte abandonamos a conca do río para chegar ata o final do sendeiro. Dende aquí parte unha derivación que nos achegará ao muíño de Cabo da Vila que aínda conserva no seu interior todos os mecanismos de funcionamento.