Construción do século XIX, de planta rectangular con muros de cachotería recebados con morteiro de cemento, deixando á vista pedras salteadas. Fronte con porta de acceso con arco alintelado e por diante, decorándoa, arco de medio punto, e por riba gran ventá con arco de medio punto. Remate de cuberta en fronte con sinxela cruz á que lle falta un brazo. A igrexa sitúase nunha contorna rural e, próxima a ela, no mesmo núcleo de Arnado temos dous exemplos catalogados de arquitectura civil, o pazo de Arnado e a casa do Pazo, ademais da igrexa de San Xoán, edificio catalogado de arquitectura relixiosa.