Igrexa de planta rectangular, con presbiterio máis elevado, a partir de muros de cachotaría recebados con morteiro de cemento e pintados de branco. En fronte e nos laterais, ocos de iluminación abucinados, estilizados, nos que destaca a altura sobre a anchura. Espadana de corpo recto e dous ocos que aloxan senllos campanís e remate triangular.

Próximas á igrexa atopamos varias construcións populares á beira do río Leira e, ademais de observar as características arquitectónicas tradicionais propias da zona, podemos gozar coa contorna deste pequeno regato. Se continuamos río arriba, a pouca distancia do final do núcleo do Mazo, podemos apreciar un conxunto de dous muíños de rodicio, canle con muros de pedra e leito de terra, cun estado de conservación de certo abandono.