Consta dunha nave cuberta de madeira a dúas augas e capela maior cuberta a catro augas. Ante a fachada hai un pórtico con tres grandes arcos de medio punto. No interior do pórtico ábrese unha porta adintelada que enriba leva frontón, escudo do fundador do santuario e lápida con inscrición alusiva á súa fundación. Aos lados da porta dúas fiestras rasgadas e limosneiro sinxelo. O presbiterio leva ante sí un arco triunfal de medio punto e da teitume colga unha lámpada de metal amarelo do século XVI. No lado esquerdo hai un retablo de estilo renacemento popular, con dous corpos e frontal con pinturas deterioradas.