O conxunto das Salgadeiras de Moreiras está composto por dúas construcións e varios camiños e pezas escultóricas no seu entorno. A Antiga Salgadeira é un edificio porticado que conserva a estrutura dunha antiga fábrica de salga. O edificio do Museo da Pesca e a Salga é o outro edificio singular no que se recolle unha escolma de elementos relacionados coa vida mariñeira. Neste espazo tamén se atopan unha serie de pezas escultóricas, algunhas veñen do Simposio de Escultura do Grove e outras proveñen da Escola de Canteiros de Pontevedra. Podemos atopalas ao noso paso polos sendeiros que cruzan a zona, dende Punta Moreiras ata a ponte sobre o Esteiro e dende Punta Moreiras ata a praia das Pipas.