Igrexa parroquial de planta rectangular dunha soa nave e grandes dimensións. Trátase dun templo do século XVII construído sobre unha antiga capela do século XIII e reconstruído posteriormente cando se lle abriron novos ocos para a entrada de luz, só conserva a fachada principal da etapa barroca. Esta fachada presenta un esquema pentagonal, no eixo vertical central superpóñense unha porta de acceso rectangular alintelada, unha ventá rectangular e a espadana barroca rompendo a liña de cornixa. A fachada atópase enfuscada cos esquinais, ocos e a espadana en cantería á vista. A cornixa ten forma curvilínea e rematando os esquinais colócanse dous pináculos. A espadana constitúese por un corpo con tres machóns unidos por arcos de medio punto e dúas campás. O remate realízase mediante un frontón con óculo e pináculo central partindo o arco da cornixa e cunha cruz metálica como remate. Cabe destacar a súa situación xeográfica á beira da ría de Sada.