A capela de Santa Irene de Castrillón está situada nun fermoso miradoiro natural dende o que se divisa boa parte da costa carballesa. Érguese na parte máis alta dun antigo castro, que lle dá o nome actual ao lugar, Castrillón. 

Din as lendas que as pedras da capela foron traídas unha a unha dende o fondo da lagoa de Baldaio, moi próxima a ela. Algo (non todo) de certo hai... A capela foi trasladada hai séculos dende o seu emprazamento orixinal, á beira da lagoa e preto da fonte de Santa Irene. Hai referencias que constatan que, no 1594, aínda estaba na marisma mentres que, no século XVIII xa a situaban no emprazamento no que agora se encontra.