Sitúase na cara principal da Capela de San Roque. É un peto de ánimas de tipo aberto realizado en azulexo policromado. Ten na súa parte inferior unha especie de pousadoiro ou mesa de pedra co caixón das esmolas por riba. O retablo do referido peto áchase conformado por nove azulexos en filas de tres. Preside o conxunto a imaxe de San Roque que mostra a ferida da súa perna esquerda, estando acompañado dun can que leva na súa boca unha barra de pan.