A igrexa foi reconstruída en 1715 sendo o seu párroco D. Francisco de Puga y Villamarín, se ben é máis ca probable a súa existencia xa a finais do S.XII ou comezos do S. XIII como a inmensa maioría das existentes en todo o termo municipal. Todo parece indicar que foi sempre unha presentación laical dos señores da Casa de Redondelle de San Xes, no Concello da Peroxa. Desde 1566 sufriu diversas modificacións, se ben en 1776 o seu párroco, D. Domingo Vales, incorporou novas modificacións. Outro dos seus párrocos máis importantes foi D. Francisco Antonio Losada, que a rexeu desde 1781 e foi señor xurisdicional de San Cibrao de Armental e Bacariza do Cabo, en terras de Valdeorras, e membro da xa indicada Casa de Redondelle, a quen pertencían os dereitos desta igrexa parroquial.

A súa estrutura parte dunha nave principal que sufriu sucesivas ampliacións cara o leste, engadindo así dúas capelas nos laterais que forman un pequeno transepto, e un espazo dedicado ao presbiterio a modo de testeira.