O cruceiro forma un interesante conxunto patrimonial co pazo de Trasouteiro, a capela da Nosa Señora da Concepción e as antigas escolas pías, enfronte das cales está situado.
Todo este conxunto, agás o pazo, foi mandado construír a comezos do século XIX por Andrés de Aguiar e Caamaño, bispo de Mondoñedo oriúndo desta casa fidalga.
Trátase dun cruceiro monumental, de longo e esvelto varal erguido sobre unha plataforma octogonal de cinco chanzos. A cruz ten unha figura postrada en actitude orante que podería representar ao benfeitor.
No seu varal hai dúas figuras con roupas de peregrino: San Roque no leste e Santiago Apóstolo no oeste.  O cruceiro sitúase no vello camiño de Vimianzo a Santiago de Compostela.