O cruceiro dos Santos ou de Cheis é dos máis antigos de Galicia, do século XV ou comezos do XVI. Atópase nunha encrucillada do vello camiño Real que unía Baio coa Ponte Olveira. Chama a atención a cantidade de figuras que se poden ver na cruz e a propia feitura imitando o tronco dun carballo desta.
No lado oeste represéntase a Trindade, coa pomba-Espírito Santo, o Pai, o Fillo Xesús no colo, e un peregrino. No lado leste, Cristo crucificado con tres cravos, cunha figura postrada aos seus pés e cun anxo cunha coroa sobre a cabeza. A cada lado da cruz están San Xoán e a Virxe María.