A igrexa responde o formato de planta rectangular, rematada nunha cabeceira cadrada, máis estreita e alta que o corpo principal. Polo muro setentrional da ábsida engádese unha sancristía. Todo o conxunto é de cantaría.

A fachada principal organízase como un lenzo unitario, enmarcado por pilastras laterais, e coroada por un campanario central. No eixo central deste paramento ábrese a porta de entrada que se nos mostra enriquecida por unha sinxela moldura. No lintel da porta aparece a inscrición alusiva á construción do templo (1797).

Sobre este oco disponse unha fornela, flanqueada por un friso convexo truncado,a modo de orixinal moldura rampante.

O frontispicio coróase mediante senllas cornixas, que traducen a dobre vertente da fachada, e que se interrompen para albergar entre elas unha espadana de triplo oco. Sobre as esquinas da igrexa e campanario, álzanse pináculos piramidais con remate bulboso.