O río Eo acompaña a este roteiro durante case a metade do seu percorrido. O seu leito caracterízase pola gran biodiversidade que o envolve. A calidade da súa contorna natural fai que o mesmo se inclúa na Reserva da Biosfera “O río Eo, Oscos e Terras de Burón”.

Partindo da coidada praia fluvial do Chao de Pousadoiro, a senda discorre entre bosques de galería xunto ao río Eo e visita os muíños distribuídos ao longo do seu curso. A súa contorna natural e o seu suave perfil conforman un percorrido agradable que se achega ata a área recreativa da Retorta.

Tras un breve tramo de asfalto, o carreiro abandona o fondo do val e comeza un zigzagueante ascenso cara ao pétreo e magnífico miradoiro de Pena Milleiros, con excepcionais vistas das serras de Pena Armada e de Meira, así como do val do río Eo.

Antes de finalizar en Barcia, o camiño transcorre pola aldea de Sadrarín, onde aínda se aprecian exemplos da arquitectura tradicional, con mención especial aos seus típicos hórreos.