Manancial nun pequeno espazo cercado con mampostería de granito, a modo de muro de contención, situado máis baixo que o nivel do chan da contorna. Nese lugar abrolla a auga e mantén chea unha pía de pedra de forma rectangular. A fonte está a carón do cruceiro da Capela das Neves, coñecida en tempos pasados pola Capela da Fonte. Á auga desta fonte atribúeselle propiedades milagreiras, entre elas a de aumentar a cantidade e calidade do leite das mulleres que beben nela, así como a de todas as femias do gando doméstico que abeberaran alí.