Este salto de auga, que exerce de límite natural entre a parroquia de San Cristovo de Dombodán no concello de Arzúa e a parroquia de Santa María de Turces no concello de Touro, é coñecido popularmente como fervenza das Hortas, collendo o tpónimo do lugar no que se atopa.

Pero ademais recibe tamén o nome de fervenza de Santa Marta, por unha lenda que ten asociada a esa santa. Contan que unha moza que adoitaba ir moer ao muíño que hai nese lugar quedou embarazada do seu noivo e este, ao enterarse, rexeitouna e tentou asasinala tirándoa dende o alto da fervenza. Mentres caía, ela exclamou ¡Santa Marta me vaia! e nese momento un carballo amortiguo a súa caída salvándolle a vida. 

A maneira máis doada e curta para chegar ata a ela é dende o lugar das Hortas. No centro deste núcleo atoparemos un panel informativo. A partir de aí seguiremos a pé para baixar, durante 400 metros, por un camiño ben acondicionado e pouco esixente que nos levará ata o pé desta fervenza que cae dende unha altura aproximada duns 20 metros.