Na parroquia de Burgueira (Oia), na comarca do Baixo Miño, atopamos esta pequena ruta circular de pouco máis de 1 km que discorre á beira do río Tamuxe, tamén chamado río Carballas.

O paseo parte dende unha área recreativa, unha zona de piñeiros con bancos e merendeiro, dende onde xa vemos unha ponte de madeira que atravesa o río. Durante o noso percorrido, atoparemos dous muíños fariñeiros restaurados, ao lado dos que podemos ver os restos das moas de pedra que se usaban para triturar o gran. Poderemos observar tamén como o río descende formando rápidos e pequenos saltos de auga que dan lugar a pozas ou piscinas naturais con profundidade suficiente como para poder darnos un baño nos días de máis calor. 

Un pouco máis arriba da fervenza atópase o encoro de Vilachán, construído no ano 1993 e situado 150 m río arriba. Deixando agora o Tamuxe á nosa dereita, descenderemos por unha pista forestal para chegar de novo ao punto de partida.