O río Negro, pegadas muiñeiras camiño do mar

Entre o rueiro dos Muíños, na parroquia de Moraime arrinca este percorrido baixando unhas escaleiras ata unha pequena área recreativa e lavadeiro. Segue por un camiño, maiormente en forma de pasarela de madeira, adaptándose ao curso do río Negro.

Podemos observar diversos muíños, algúns deles abertos conservando as moas, grandes pezas circulares de canteiría de granito que se usaban para triturar o gran. Xa cando se albisca a foz na praia de Area Maior, atravesamos o rego e subimos por unha estreita corredoira entre loureiros ata un camiño máis principal que nos leva decontado a unha pista asfaltada que abandonamos pola dereita por unha senda que nos ha levar ata o aparcadoiro do areal, onde remata esta ruta.

Os Muíños (43°05'1.95''N / 9°11'19.12''O)

Praia de Area Maior (43°05'18.23''N / 9°11'33.84''O)