A pouca distancia do núcleo de poboación encóntrase o Cabo do Roncudo. Debe o seu nome ao rouco son producido polas ondas ao se estrelaren contra as rochas. O paso fronte a este promontorio é unha manobra arriscada, a pesar da presenza do faro que guía ás embarcacións na súa singradura por estas augas traizoeiras. O percebe destes cantís goza dunha merecida fama mundial polo seu sabor e tamaño. A súa captura está severamente regulada, para non esquilmar un recurso que alimenta a moitas familias da comarca.