Agochada no Tambre

Este itinerario forma parte doutro máis longo que percorre as terras de Brión. Nós imos seguir as balizas marcadas en laranxa saíndo dende a área recreativa da ponte das Pías, onde atopamos instalacións para a práctica do piragüismo nas augas do río Tambre. Alí atoparemos un panel informativo coa ruta a seguir.

O primeiro treito mergúllanos nunha carballeira de grande beleza que nos protexe da calor nos días de Sol, ata chegar a un cruce onde colleremos cara á dereita para achegarnos á aldea de Ons de Abaixo. Aquí atoparemos varias mostras etnográficas, como hórreos, lavadoiro e fonte. Atravesamos o lugar para coller unha pista sinalizada que xa nos marca o camiño do pozo Negro.

Unha baixada pronunciada envolta entre carballos lévanos ata a fervenza, nun entorno de grande beleza. Pasamos unha pontella de madeira e o sendeiro vai bordeando as ribeiras do río Tambre ata chegar á costa dos muíños que nos levará ata o cruce que vimos no camiño de ida. Aquí regresamos ata á ponte das Pías onde rematamos esta ruta circular.

Ponte das Pías (42°54'01.65''N / 8°43'58.13''O)