Ao pé da serra do Faro de Avión

Un clásico nas rutas de sendeirismo de fácil percorrido, seguindo o río Cerves dende o aparcadoiro habilitado á beira da estrada N-120. Veremos varias zonas de amplas fervenzas (cómpre ter coidado polo esvaradío das pedras), algunha delas superando os 14 m de altura, ata chegar á ponte da aldea das Mestas.

Aquí o río colle folgos por tratarse dunha zona chaira ata comezar o ascenso ao miradoiro da derradeira fervenza, á que nos poderemos achegar baixando ata a ponte que atravesa o río Cerves e unha plataforma de metal que permite situarnos por enriba das súas augas. O regreso pode ser refacendo as nosas pegadas, ou se estamos con forzas, continuar á aldea de Tourón e facer así o camiño máis longo.

Área recreativa (42°16'00.23"N / 8°12'23"O)

Miradoiro da fervenza (42°16'16.22"N / 8°13'35.65''O)