De árbore en árbore

Paseando por enriba das árbores, este podería ser o resumo deste itinerario en Parada de Sil. Comezamos na Fábrica da Luz, antigas instalacións de produción de enerxía hidroeléctrica de comezos do século XX, hoxe reconvertida en albergue e centro de recepción para aqueles que queiran facer rutas BTT na contorna.

A partir de aquí, unha pasarela de madeira lévanos por un túnel arbóreo no canón do río Mao, que apenas vemos pero percibimos polo ruxir das súas fervenzas. Na metade do camiño desaparece este teito vexetal e podemos gozar da visión do val e pararnos nun miradoiro habilitado. Pequenos, e maiores tamén, poden aprender máis da riqueza faunística e botánica grazas a paneis e xogos didácticos situados ao longo do percorrido. O treito final é unha escaleira que baixa ata ás beiras do río Mao no punto en que se vai achegando ao río Sil onde desemboca.

Río Mao (42°22'54.55''N / 7°29'48.24''O)