Para chegar a esta seimeira (nome que reciben as fervenzas  nesta zona) debemos dirixirnos ata A Fonsagrada e, dende alí, seguir pola estrada LU-721 ata chegar á ponte de Vilarín de Abaixo, onde atoparemos un cartel informativo sobre a ruta de Chaila.

Seguimos as indicacións e camiñamos por unha pista forestal ata atopar un pequeno camiño á man dereita que, aínda que se atopa bastante escondido pola maleza, levaranos directamente ata a fervenza de Rozabragada. O acceso non está acondicionado nin sinalizado e a baixada, por un camiño empedrado, soe estar esvaradía. Debido a isto recoméndase levar calzado adecuado e descender con precaución, e desaconsellase realizala con nenos.

Unha vez que remata esa senda, se queremos ver ben a seimeira, teremos que descalzarnos e cruzar o río Suarna.