O rego de Fiós é un afluente do río Batán que desemboca no río Sil no lugar de Rabacallos. Para chegar á fervenza colleremos a estrada que vai de Parada de Sil a Teixeira para seguir despois o desvío cara a Entrambosríos. Ademáis das fervenzas, hai outro aliciente para achegarnos a esta zona, xa que aquí poderemos visitar tamén un castiñeiro milenario que figura no Catálogo de Árbores Senlleiras de Galicia, o que lle proporciona un especial coidado e protección. Trátase dun xigante, de aproximadamente 700 anos, que ten 15 metros de altura e máis de 9 metros de perímetro rodeado por un bosque autóctono no que atoparemos restos de sequeiros e muíños tradicionais.