As augas que se xuntan na serra do Suído, na súa vertente ourensá, caen dando lugar a numerosos saltos de auga que forman as cabeceiras ou nacentes do río Avia. Dende Avión colleremos a estrada que vai a Mouriscados e continuaremos ata Boeixos. Xusto na entrada da aldea, antes das primeiras casas, hai un cartel que indica a dirección cara ao miradoiro. Deixamos aquí o coche e ascendemos por un camiño ata uns muíños, onde xiraremos á esquerda para seguir pola pista que nos levará ao pé do rego das Fragas.

A fervenza, que vai caendo sobre unha gran laxe dende aproximadamente 60 metros, é das máis altas das que se forman nesta zona.