En Fornelos de Montes colleremos a estrada PO-9303 que nos levará ata o lugar da Airoa. Xunto ás últimas casas da aldea deixaremos o coche para coller o carreiro que baixa á carón da capela do Castro e que nos levará a unha antiga ponte de pedra que cruza o rego Fonte Uceira. Dende alí colleremos o camiño empedrado que sube á man esquerda para chegar ata a Portela da Brea, dende onde poderemos observar xa a fervenza. Neste punto atoparemos o único sinal que hai na ruta e que nos indica a dirección a seguir para baixar ao pé das fervenzas. Situadas no río Valdohome, unha das cabeceiras do río Parada, a de maior altura ten unha caída de aproximadamente 8 metros. A ruta non está sinalizada.