Esta fervenza está no río Arcos, que desemboca no río Xallas logo de discorrer polo val que separa os macizos graníticos do monte  Pindo e dos montes da Ruña. Antigamente este río vertía as súas augas no río Xallas para despois precipitarse directamente ao mar, pero isto cambiou coa construción do encoro de Santa Uxía.

Para chegar ata este salto de auga teremos que dirixirnos á depuradora da Noveira, no concello de Mazaricos, xunto á que atoparemos un panel informativo sobre a Ruta das Fervenzas deste concello que, ademais da Noveira, inclúe as fervenzas de Gosolfre, Fírvado, Vioxo-Chacín e santa Locaia.

Dende aí camiñaremos só uns metros ata chegar a esta singular fervenza, duns 10 metros de altura e caracterizada polos erosionados bloques de pedra e as pozas a varios niveis onde, nos días de calorosos, poderemos incluso darnos un baño.