O rego da Xestosa, afluente do río Landro, discorre entre o monte Guriscado e a serra da Gañidoira para unirse ao Landro en Xerdiz, Ourol. Cando abandona o concello de Muras ten que atravesar unha zona de rochas que o obrigan a dar varias voltas e a salvar distintos desniveis, o máis grande duns 20 m.

Para chegar a esta fervenza subiremos dende Ourol, collendo a antiga estrada á altura de Penabade, e aí atoparemos a sinalización que nos indica que debemos descender por un bosque de piñeiros e camiñar uns 200 m para chegar ao pé deste salto de auga.