Para visitar a fervenza de Brañas partimos de Melide e collemos a estrada DP-4604 en dirección a Friol. Percorremos por esta estrada 9 quilómetros ata o lugar de Ínsua e, 500 m despois de Ínsua, desviarémonos seguindo xa a sinalización cara a fervenza de Brañas. 

A unión do rego da Pedra co rego Salgueira da lugar ao río Furelos. Xusto despois da unión o río atopa un obstáculo en forma de salto vertical, formando unha cascada de case 40 metros de altura. Ao pé dela atopamos un muíño en estado ruinoso e unha pequena área de lecer.

Este salto de auga está na serra do Careón, catalogada como LIC (Lugar de Importancia Comunitaria) e ZEPVN (Zona de Especial Protección dos Valores Naturais).