O río Cenza nace na serra da Queixa e, á altura de Castiñeira (concello de Vilariño de Conso), cae en forma de fervenza salvando un desnivel de máis de 100 m sobre rochas graníticas. Para chegar a ela dirixirémonos ao núcleo de Vilariño de Conso e, unha vez no centro, veremos dous sinais. O que indica cara a dereita dirixiranos a unha pasarela de madeira que nos conduce a un miradoiro situado na parte alta da fervenza, dende onde podemos ver tamén a chamada Ola do Cenza e os distintos saltos, pozas e rápidos que vai formando o río.

Se seguimos o camiño da esquerda chegaremos ata unha zona de pasarelas de madeira e miradoiros dende os que poder ver diferentes treitos do río, e os diferentes saltos. A primeira parada será no miradoiro de Poza Moura e, dende aí, continuaremos cara ao miradoiro de Penedo Redondo.