No lugar da Cela, concello de Lobios, podemos atopar a poza da Seima, tamén coñecida como pozo Negro. Despois de cruzar a aldea, pasadas as últimas casas, deixaremos o noso vehículo para facer o resto do traxecto a pé, en total camiñaremos 3,4 quilómetros (ida e volta).

Colleremos un sendeiro que sae a man esquerda e camiñaremos por el uns 200 metros ata enlazar con outro que, aínda que está sinalado cunha baliza de camiño errado, é o que hai que seguir. Ao comezo está empedrado e descende bruscamente pero, pouco máis adiante, convértese nun carreiro que descende arroupado por unha carballeira e chega ata a beira mesmo da poza. Dende aí podemos ver como o río Salas cae dende 15 metros de altura dando lugar a unha espectacular fervenza.