Na estrada A Guarda-Baiona, collemos o cruzamento a  Mougás e seguimos pola estrada que pasa á dereita da igrexa, de fronte ao monte. Tomamos a primeira pista de terra que sae pola dereita e en 2'3 km atopámonos co río Viladesuso, no que atoparemos varios saltos de auga e pozas. O río Boi ou Viladesuso nace nas  Sobreiras  do Faro, que foi declarado Espazo Privado de Interese Natural en xaneiro de 2011, converténdose no primeiro de Galicia. Trátase dunha das escasas masas de sobreiras en rexións con clima oceánico que se coñecen en Galicia, o que lle confire unha notable singularidade bioxeográfica. O acceso está indicado.