Para chegar a esta fervenza seguiremos un percorrido que parte do lugar da Ponte, no concello da Cañiza. Alí podemos ver a ponte Noceifas, dun só arco e lixeiramente apuntada, que moitos catalogan como romana aínda que os últimos estudos dátana nos séculos XVII-XVIII.

Dende aquí continuamos por unha senda que nos levará ata a praia fluvial de Mandelos, xa no concello de Crecente, para seguir despois á beira do río Ribadil, afluente do rio Miño, rodeados por grandes fentos e vexetación de ribeira.

Durante o camiño atoparemos antigos muíños e pequenos saltos de auga ata chegar á fervenza do Pozo do Inferno, á que se accede a través de pasarelas e escaleiras de madeira e que conta cun miradoiro dende o que poder desfrutar das vistas.